Бақытбек Смағұлдың қазақ және орыс тілдеріндегі 3 томдық шығармалары жинағының тұсаукесері

     Кітапханада Qazaqstan Ardagerleri Қауымдастығының төрағасы, ҚР Мәжіліс депутаты, Nur Otan партиясы Фракциясының мүшесі Бақытбек Смағұлдың қазақ және орыс тілдеріндегі 3 томдық шығармалары жинағының тұсаукесері болып өтті.
     Осыған орай «БАТЫРЫН БАҒАЛАҒАН ЕЛДІҢ БАҒЫ ТАЙМАС» атты конференция ұйымдастырылды. Конференцияның атауы кездейсоқ таңдалмаған: Бақытбек Смағұл шығармаларының барлық үш томы да ұлттық рухтың ұстыны – батырларға арналған.
Шығармалар жинағының І-томы Қазақ елінің көк байрағын желбіретуге қаруымен де, қаламымен де үлес қосқан, өз тұсында ұлтты ұлықтаудың, тілді түлетудің, мемлекетті мәңгілік етудің жөн-жосығын көрсетіп кеткен заңғар тұлға, отаншыл азамат, Кеңес Одағының Батыры Бауыржан Момышұлына қатысты зерттеулерге орын берілген. Онда Qazaqstan Ardagerleri Қауымдастығының, қазіргі ұрпақтың батыр аманатын орындауының нәтижелері, қаһарман есімін ұрпақ жадында мәңгілік қалдыру мақсатында атқарылған шаралар туралы жан-жақты әрі қызықты әңгімеленеді. 
    ІІ-томда автор Борис Керімбаев (12.01.1948–12.02.2019) туралы ой толғайды, сыр шертеді. Оның ерен ерліктеріне, еселі еңбектеріне тоқталып, батыр һәм батыл бейнесінің асқақ мүсінін сомдайды. Автор отаншыл асқақ рух, мемлекетшіл биік сана, соғыс пен бейбітшілік жайында өз пайымдарын ортаға салады.
     ІІІ-томдағы естеліктер «Үш қырлы жебе» деген ортақ атаумен біріктіріліп отыр: онда Бақытбек Смағұл Ауған соғысының үш алыбы, атап айтқанда, Байғали Қоқымбаев, Әлімжан Ерниязов, Габиль Халафов сияқты от пен суды бірге кешкен қарулас достары, өзі көрген соғыстың үлкен мектебінен өткен, қан майданның қатал тезінде сыналған үш арыстың былайғы жұртшылық біле бермейтін, бірақ Ауған соғысында аңызға айналған ерен ерліктерін суреттейді. Еңбек ел бірлігін, халықтар достығын дәріптейді.
Барлық 3 том байырғыдан бергіге дейінгі батырларымыздың ерлік жолын жас ұрпақ санасына берік ұялатуға, жастарды ойы озық, рухы берік етіп тәрбиелеуге үлес қосады. Жинақтардың тілі шұрайлы, мазмұны қызықты, тарихи құндылығы жоғары. Кітап ҚР Мәдениет және спорт министрлігінің қолдауымен «Сардар» баспа үйінде басылып шықты. 
     Іс-шараға Қазақстан ғарышкері, Халық қаһарманы Айдын Айымбетов, қазақстандық зілтемірші, бірнеше дүркін әлем чемпионы, рекордшы Илья Ильин, жалаң қолмен шеге өретін алып, күш қойылымдары жөнінен төрт мәрте әлем рекордшысы Сергей Цырульников, Кеңес Одағының батыры Николай Кремениш, Парламент депутаттары және т.б. қатысты. Бұдан бөлек, өңірлерден кітапханалар ұжымдары, Ауған ардагерлері ұйымдарының жетекшілері, сондай-ақ республикалық «Әкелер одағы» бірлестігінің, Тұңғыш қорғаныс министрі, Халық қаһарманы С.Нұрмағамбетов атындағы «Сағадат батыр» спорт клубының, «Жас сарбаз» республикалық балалар мен жасөспірімдердің әскери-патриоттық қозғалысының өкілдері іс-шараға онлайн режимде қосылды. 
Ең бастысы, іс-шараға кітаптардың бірінің басты кейіпкерлері – Ауған соғысының ардагерлері Байғали Қоқымбаев, Әлімжан Ерниязов, Габиль Халафов қатысып, сөз сөйледі.