ҚР Мәдениет және спорт министрлігінің Нұр-Сұлтан қаласындағы ҚР Ұлттық академиялық кітапханасы Қазақстанның Словакия Республикасындағы Елшілігімен бірлесіп Абай Құнанбайұлының «Қара сөздері» словак тіліне аудармасының онлайн тұсаукесерін өткізді

       5 қазанда ҚР Мәдениет және спорт министрлігінің Нұр-сұлтан қаласындағы ҚР Ұлттық академиялық кітапханасы Қазақстанның Словакия Республикасындағы Елшілігімен бірлесіп Абай Құнанбайұлының «Қара сөздері» словак тіліне аудармасының онлайн тұсаукесерін өткізді. Бұл словак тіліне аударылған ұлы классиктің алғашқы туындысы.
       Ұлы қазақ философы мен ағартушысының 175 жылдық мерейтойына орайластырылған онлайн-іс-шара екі елдің академиялық топтары мен шығармашылық зиялы қауым өкілдерінің басын қосты.
      Іс-шараға Қазақстан Республикасының Словакия Республикасындағы Төтенше және Өкілетті Елшісі Роман Василенко, Братиславадағы экономикалық университеттің профессоры Ольга Нахтманова, Абай Құнанбайұлының «Қара сөздері» кітабының словак тіліне аудармасының авторы Катарина Стрелкова қатысты.
      Қазақстандық тараптан тұсаукесерге Қазақстан Республикасы Ұлттық Академиялық кітапханасының басшысы, педагогика ғылымдарының докторы, профессор –Үмітхан Дәуренбекқызы Мұңалбаева, ақын, Қазақстан Жазушылар одағының төрағасы – Ұлықбек Есдәулет, М. Әуезов атындағы Әдебиет және өнер институтының директоры, Қазақстанның еңбек сіңірген қайраткері, филология ғылымдарының докторы - Кенжехан Слямжанұлы Матыжанов қатысты.   
      Дана ақынның еңбектері арқылы қазақ халқының рухани байлығы мен мәдениетін тани алатын шығарма әлемнің көптеген тілдеріне аударылған және қазір словак оқырмандары үшін алғаш рет ашылуда.
      Абай Құнанбайұлының шығармасының тұсаукесері бұқаралық ақпарат құралдары мен Facebook және Instagram әлеуметтік желілерінде кеңінен жарияланатын болады.