«Екі Кенен тумайды, Алатауға ексең де» атты жыр кеші

 «Екі Кенен тумайды, Алатауға ексең де» атты жыр кеші


    Елбасының «Рухани жаңғыру» бағдарламасы мен «Жастар жылы» аясында өскелең ұрпаққа халқымыздың салт-дәстүрін, мәдениеті мен тарихын насихаттау қажеттілігі айтылған болатын.
    Осыған орай Ұлттық Академиялық кітапханада әйгілі халық ақыны, қазақтың әншілік-жыршылық өнерінің көрнекті өкілі, композитор, Қазақстанның еңбек сіңірген өнер қайраткері Кенен Әзірбаевтың туғанына 135 жыл толуына арналған «Екі Кенен тумайды, Алатауға ексең де» атты жыр кеші өтті. 
    Қазақстан Республикасы Мәдениет және спорт министрлігінің және облыс әкімдіктерінің қолдауымен ақынның шығармашылығын жан-жақты насихаттау мақсатында биыл еліміздің 9 қаласында 13 іс-шара өткізілуде.
     1994 жылы ақынның туған ауылына ат басын бұрған Тұңғыш Президентіміз Нұрсұлтан Әбішұлы: «Халқымыздың ұлы перзенттерінің бірі Кенен атамыз ел тарихында, халық есінде мәңгі сақталмақ. Аты аруаққа айналған Кенен атаның арманы ел бақыты, халықтың бірлігі, ұрпақтың баянды болашағы болды. Осы аруақ бізді қолдасын. Егемендігіміз, тәуелсіздігіміз мәңгілік болсын!» –деп ақынның аруағына тағзым еткен.
Кенен Әзірбаев Жамбыл облысы Қордай ауданының Мәтібұлақ елді мекенінде дүниеге келген. Ғасырға жуық ғұмыр кешкен атамыз өзі өмір сүрген замандағы халық тағдырына түбегейлі өзгеріс енгізген әйгілі тарихи оқиғалардың, халқымыздың еңірегенде етегі жасқа толған қасіретке толы нәубет-зұлматтардың бел ортасында болды. Соларға етене араласып, өзінің азаматтық позициясын бойындағы буырқанған дарыны арқылы айғақтап отырды.
    1916 жылғы ұлт-азаттық көтеріліске белсене қатысқан Кенен Әзірбаев «Бұлбұлға» деген әнінде:«Қаңғыртқан екеумізді патша құрғыр» деп сол кездегі патшалық саясаттың қарапайым халыққа көрсеткен қатігездігін дөп басып айтады. 30-шы жылдардағы қазақ халқының басына қасірет болып келген ашаршылдықты да көзбен көрген. Күндей күркіреген Ұлы Отан соғысының алғашқы күндерінде-ақ Алатаудың ақиық қыранындай саңқылдап, «Біздің Отан жеңеді!» деп жар салды.
Кенен Әзірбаев – бейбіт өмір мен жасампаз еңбекті жырлаған көптеген толғау, поэмалардың авторы. Шығармаларының негізгі өзегі: тұтас халықтың өмірі мен пенде ретіндегі әрбір жеке адамның арман-үміті. Ол – тыңдаушысының құлақ құрышын қандырған әнші, таңды-таңға ұрып эпикалық жыр-дастандарды жырлап, халықтың рухани ұйтқысы болған талант иесі. Кенен ақынның 100-ден астам әндері, өлең-жырлары, дастандары ұлт қазынасына қосылды.
Іс-шара барысында ұлт акыны Кенен Әзірбаевқа арналған кітап көрмесі және ұлы тұлғаның өмірі мен шығармашылығы туралы деректі фильм көрсетіледі.
     Шараға аса дарын иесі туған топырақтан Қордай аудандық К.Әзірбаев атындағы әдеби-мемориалдық музей құнды жәдігерлер әкеледі. Сонымен қатар, ақынның ұрпақтары көзінің ағы мен қарасындай сақтап отырған атамыздың мұраларымен бөліседі.
Іс-шараға шығармашылық және ғылыми зиялы қауым өкілдері және жастар қатысты.