Сәуле Досжанның «Қасірет пен тағдыр» атты кітабының тұсаукесері

 

     Кітапханада Қазақстан Жазушылар Одағының және Журналистер Одағының мүшесі, Қазақстанның еңбек сіңірген қайраткері Сәуле Досжанның «Қасірет пен тағдыр» атты кітабының тұсаукесері болып өтті.

    Аталмыш кітапта социалистік режим құрбандарына айналған Семей өңірі тұрғындарының қасіреті айтылады. Романның желісінде кітаптың бас кейіпкері Аяулымның басынан өткен қиын тағдыры баяндалады. Радиация кеселінен қырылған халықтың арасында ол жары мен перзентінен, ата-анасынан айрылады.

    Жазушының әрбір шығармасын асыға күтетін жазушының бұл романы да оқырмандарды бей-жай қалдырмасы анық.

    Сәуле Досжан Мағазбекқызы 1959 жылы 2 қыркүйекте Алматы облысының Ұйғыр ауданының Ақтам ауылында дүниеге келген. Көптеген лауазымды қызметтерді атқарып, түрлі сыйлықтармен марапатталған.

    2016 жылы ҚР ұлттық академиялық кітапханасы ұйымдастырған «ТӘУЕЛСІЗДІК.ӘДЕБИЕТ.ҚАЛАМГЕР» форумында «Үздік ақын» номинациясы бойынша жеңімпаз атанады. 2017 ж. «Open Eurasian Literature Festival & Book Forum-2017» (Швеция) «Мое чужое сердце» кітабы проза жанрынан үшінші орын иеленсе, ал 2018 ж. Астананың 20 жылдығына арналған «Ел тірегі – Елорда» жыр мүшайрасында бірінші жүлдені иемденген.

    С.Досжан «Жыр тәж», «Үшінші есіктің құпиясы», «Жатқа туған бала», «Арман қала», «Үлкен үйдегі үрей», «Құдіретті қалам иесі», «Өгей жүрек», «Мое чужое сердце», «Сағыныш» атты кітаптардың авторы.

    Іс-шараға Мырзатай Жолдасбеков, Әділ Ахметов, Алтыншаш Жағанова, Көпен Әмірбек,  Нұртөре Жүсіп, Оразкүл Асанғазы  Тұрысбек Рахымжан, Шәкір Ыбраев, Шерубай Құрманбайұлы, Қуаныш Жиенбай және т.б. қатысты.