Будапештте Абай Құнанбайұлының 175 жылдығы аталып өтті

    2020 жылғы 29 қаңтарда Қазақстан Республикасының Будапешт қаласындағы Елшілігі қазақ ақыны Абай Құнанбайұлының 175 жылдығын мерекелеу аясында Қазақстан Республикасы Ұлттық академиялық кітапханасы делегациясының қатысуымен «Әлем таныған Абай» кітап-иллюстрациялық көрмесі мен «Абай әлемі» фотокөрмесінің тұсаукесер рәсімін өткізді.
    Түркітілдес мемлекеттердің ынтымақтастық кеңесі өкілдігінің ғимаратында Венгрия мен Қазақстанның шығармашылық зиялы қауымының, қоғамдық-саяси, ғылыми және мәдени топтарының өкілдері, Қазақстан Жазушылар одағының төрағасы Ұ.Есдәулет бастаған абайтанушылар, қазақ диаспорасы, сондай-ақ қазақ тілі, мәдениеті мен салт-дәстүрін зерттейтін венгр студенттері іс-шараға қатысты. 
    Елші Ж.Әбдірашов өзінің құттықтау сөзінде Қазақстан мен Венгрия арасында тек саяси және экономикалық қатынастар дамып қана қоймай, мәдени-гуманитарлық ынтымақтастық белсенді түрде дамып келе жатқанын атап өтті. Атап айтқанда Будапештте А. Құнанбайұлының ескерткіші бар.
    Мажарстан елінен Венгрия Премьер-Министрінің кеңесшісі, Венгрлік қалам клубының президенті Г.Сох сөз алып, Абай шығармаларының терең философиялық мәнін, оның әлемдік мәдени мұраға қосқан үлесін атап өтті. Ол сондай-ақ Қазақстан мен Венгрия арасындағы екіжақты мәдени-гуманитарлық қатынастардың дамуына жоғары баға берді.
    Іс-шарадан кейін Астана көшесіндегі Будапешттің орталық саябағында Абай Құнанбайұлының ескерткішіне гүл шоқтарын қою рәсімі өтті. Сондай-ақ, қазақ диаспорасының өкілдері, қазақ және венгр студенттері Абай өлеңдерін оқып,  әндерін орындады.