«Абай – дана, Абай – дара» атты поэтикалық-музыкалық кеш өтті

«Абай – дана, Абай – дара» атты поэтикалық-музыкалық кеш өтті
      Кітапханада ақын, ағартушы және философ Абай Құнанбайұлының туған күніне орай поэтикалық музыкалық мереке болып өтті. 
Іс-шараның мақсаты: Абайдың рухани құндылықтарын, қазақтың ұлы ақынның өткені мен бүгінін бейнелейтін шығармашылық мұрасын кеңінен насихаттау, оның сөздері ешқашан өлмейтін ұрпақтарына қалдырған мұра ретінде халық жадында қалады.
Мерекелік жиын барысында «Ұлы даланың дана ойшылы – Абай» және «Ғасырлар үндестігіндегі рухани мұра» иллюстрациялық-кітап көрмелері, «Abai поэмалары. Өлеңдері мен аудармалары. Қара сөздер. Әндері» және «Абай-челлендж» кітаптарының тұсаукесері, Ұлы Абайдың өлеңдерін және әндерін оқу, «Құнанбай» кино көрсетілімі, «Абай ұлттың рухани гиппократы» атты дөңгелек үстел, «Абай бейнесі суреткерлер көзімен» атты сурет көрмесі ұйымдастырылды. 
      Бұл шара Абай Күнбайұлының мерейтойы қарсаңында өткізіліп отыр. ҚР Президенті Қасым-Жомарт Тоқаев 2019 жылдың 30 мамырында Біріккен Ұлттар Ұйымының білім, ғылым және мәдениет ұйымы (ЮНЕСКО) және Халықаралық түркі мәдениеті ұйымының (TURKSOY) қамқорлығымен өтетін Абай Құнанбайұлының 175 жылдығын мерекелеу туралы жарлыққа қол қойды. Бұл туралы Қ.Тоқаев өз сөзінде былай деді:
  –Абай, шын мәнінде, қазақ болмысының айнасы. Ақынның дара тұлғасы – халқымыздың руханиятын әлемге танытатын теңдесі жоқ құндылық. 
Мерекелік жиынның ашылуында сөз сөйлеген ҚР Ұлттық академиялық кітапхананың басшысы Үмітхан Дәуренбекқызы: 
Бүгін ең аяулы ақын, ең дана ұстазымыз Абайдың туған күніне арналған іс-шаралардың жалғасы болып отырған кездесуге жиналып отырмыз. Жылдан жылға Абайдың аты жаңаша асқақтап, халқымыздың мәртебе-мерейі жаңа биікке көтерілумен келеді, – деді. 
Бұдан әрі «Abai поэмалары. Өлеңдері мен аудармалары. Қара сөздер. Әндері» және «Абай-челлендж» кітаптарының тұсаукесерінде сөз сөйлеген мекеме басшысы:
Алдағы 2020 жыл Абай Құнанбайұлының 175 жылдық мүшелімен белгілі екендігі жұртшылыққа аян. Осыған байланысты, елімізде және жаһандық кеңістікте көптеген шаралар қолға алынып отыр. Осындай шараның бірегейі әлеуметтік желілердің қолданушылары тарапынан кең тарала бастаған қазақтың ұлы ақыны Абай Құнанбайұлының шығармашылық туындыларын оқу challenge болып отыр. Осыған орай Ұлттық академиялық кітапхана ұжымы «Abai поэмалары. Өлеңдері мен аудармалары. Қара сөздер. Әндері» және «Абай-челлендж» кітаптарын оқырмандарға таныстырудамыз,– деді. 
Сондай-ақ, аталмыш іс-шараға Шығыс Қазақстан облысы мәдениет, архивтер және құжаттама басқармасының Шығыс Қазақстан облыстық Абай атындағы әмбебап кітапханасы осы ұйымдастырылған іс-шараға «Ғасырлармен үндескен асыл қазына» әдеби экспозияциясымен қатысты. 
    Бұл көрмеде Абай оқырманы болған заманнан сақталып келе жатқан, ғұлама ақын пайдаланған, XVIII ғасырдың соңы мен XX ғасырдың басында жария көрген құнды әдебиеттерді көпшілік назарына ұсыну, кітапхананың сирек қоры жайлы  ақпарат берілді.
Экспозицияда ұсынылатын кітапханамыздың сирек басылымдар қоры Семей қаласындағы 136 жылдық тарихы бар (1883 жылы негізі қаланған) қоғамдық кітапхананы ұйымдастырушылардың бірі және тұрақты оқырманы болған қазақтың кемеңгер ақыны Абай Құнанбаев өмірінің маңызды бір кезеңін ашып көрсетеді.
   Әдеби көрменің «Семей – ғасырлар тоғысында», «Абай тұлғасы сирек басылымдарда» бөлімдерінде көрмеге келушілер үшін тосын сый – Абай заманындағы басылымдардағы ғұлама ақын тұлғасына қатысты аса сирек кездесетін өлкетану дереккөздері-түпнұсқалармен қауышу болмақ. Сондай-ақ, қатысушылар кітапхананың тарихымен, 1902 жылы ашылған Императорлық Орыс Географиялық Қоғамы Батыс Сібір бөлімінің Семей бөлімшесінің басылымдарымен және саяси жер аударылған орыс өлкетанушыларының еңбектерімен танысты.
«Абай таныған кәусарлар» бөлімінде қоғамдық кітапхана сөрелерінен Абай оқып танысқан батыс ойшылдарының еңбектері, көңіліне жақын тұтып оқыған Л.Толстой, В.Жуковский, А.Пушкин, И.Крыловтай орыс классиктері, М.Лермонтовтың аудармалары арқылы Абай танысқан У.Шекспир, Ф.Шиллер, И.Гете, Дж.Байрон, Г.Андерсен сияқты батыс Еуропа классиктері шығармаларының үздік үлгілері ұсынылады.
Көрмеден Абай Құнанбайұлының Рақымжан Жаманқұлов пен Ықылас Адамбековтың редакторлығымен 1936 және 1939 жылдарыбаспа көрген латын қарпіндегі «Таңдамалы» өлеңдері  мен Елбасының «Рухани жаңғыру бағдарламасы» аясында ШҚО әкімі Даниял Ахметовтың қолдауымен жүзеге асырылған «Абай әлемі» жобасы бойынша жарық көрген Абайдың қазақ және орыс тілдеріндегі шығармалары көрмеден орын алды. 
     Кітап көрмесі Абайдың жеке өмірі мен шығармашылығына қатысты фотосуреттермен және өлке зерттеушілерінің портреттерімен безендірілді. Шара қонақтарына көне кітапхананың тарихынан, сирек басылымдар қорынан мол мағлұмат беретін, куар-кодталған шығармаларды мобильді қосымшаға жүктеу мүмкіндігі бар үлестірме материалдар таратылды.
Іс-шараға ақын,  Қазақстан Жазушылар одағының мүшесі Бақытжан Тобаяқов, ақын, Қазақстан Жазушылар одағы Нұрсұлтан қаласы филиалының басшысы Дәулеткерей Кәпұлы, жазушы, драматург, Қазақстанның еңбек сіңірген қайраткері Әнес Сарай, сатирик-жазушы Көпен Әмірбек, сондай-ақ, шығармашылық және зиялы қауым өкілдері, аудармашылар, әдебиеттанушылар мен әдебиет сыншылары, ғалымдар мен зерттеушілер, тарихшылар мен мәдениеттанушылар, дәстүрлі әншілер мен театр әртістері, кітапхана қызметкерлері, қала тұрғындары мен қонақтары, БАҚ өкілдері және т.б. қатысты.