Сайын Назарбекұлының кітаптарының таныстырылымы және шығармашылық кеші

30 қаңтарда ҚР Ұлттық академиялық кітапханасында жазушы, ақын, сәулетші, драматург, Қазақстанның еңбек сіңірген қайраткері Сайын Назарбекұлының кітаптарының таныстырылымы және шығармашылық кеші болып өтеді.

Іс-шара барысында сәулетшінің қазақтың белгілі тарихи тұлғаларының басына көтерген кесенелері мен күмбездері және шығармашылығы жайлы әңгімелер қозғалатын болады. Сондай-ақ, «Абай әлеміне саяхат», «Қазақ халқының шежіре тарихы» 8 томдығы, «Жастармен сұхбат» және 5 томдық шығармалар жинағының таныстырылымы өтті.  

Сайын Назарбекұлы қазақ мәдениетіне өзіндік үлесін қосқан тұлғалардың бірі. Абай, Шәкәрім, Мұхтар Әуезовттiң ата-анасына, «Домалақ-Ана, «Хан Ордалы Сарайшық», Сұлтанмахмұт бабаларымыздың кесенелерін салды. Сондай-ақ, оның кеңесімен Тоқтамыс батыр күмбезi, Дiлдә, Әйгерiм, Ақылбай, Шәкiр Әбенов сағаналары мен Мамай батыр, Көкбай ақын және Кеңгiрбай баба күмбездерiнiң өмiрге келуiне де елеулі үлес қосты. Осы еңбектерi үшін ол 1996 жылы «Құрмет» орденiмен марапатталды. «Домалақ-Ана» және «Хан Ордалы Сарайшық» кесенесiн өмiрге әкелдi.

Шығармашылық кешке зиялы қауымның көрнекті өкілдері Мырзатай Жолдасбеков, Төлен Әбдіков, Қойшығара Салғарин, Сауытбек Әбдірахманов, Ғарифолла Есім, Тұрсын Жұртбай және т.б. зиялы қауым өкілдері қатысты.Сонымен қатар, әсем әнімен Айгүл Қосанова, Гүлмира Сарина кештің көркін келтірді.