«Насаб наме сұлтан Сыдық» кітабының таныстырылымы өтті

Ұлт руханияты тағы бір қазыналы құнды дүниемен толықты. Ұлттық академиялық кітапханада осыдан жүз отыз жыл бұрын ескі жазба тілінде жарық көрген сұлтан Ахмет Кенесариннің «Насаб наме сұлтан Сыдық» атты кітабының таныстырылымы өтті.
Бұл тарихи кітапты қазақшаға жас ақын Ербол Алшынбай аударған. Автор жинаққа ғылыми түсініктемелерімен бірге іргелі еңбекте келтірілген тың деректерге сай Кенесары хан мен сұлтан Сыдықтың жорық жолдарының картасын да көрсеткен.
Таныстырылым барысында кітапқа алғы сөз жазған ҚР Президентінің Баспасөз хатшысы Берік Уәли осындай баға жетпес құнды дүниені халқымызбен қауыштырған авторға ризашылығын білдірді.
– Кенесарының жорық жолдарының картасы және ғылыми түсіктемелер жасалған туындының жарық көруіне демеушілік жасаған – Altyn Qyran Foundation қоғамдық қоры. Бұл еңбекте Кенесары хан мен оның әулеті, ұлы Сыдық сұлтан туралы көптеген ғылыми жаңалықтар айналымға еніп отыр, – деді ол.
Сондай-ақ аталған жинаққа рецензия жазып, ғылыми түсініктемелерді орнықтыруға атсалысқан тарихшы Жамбыл Артықбаев мұндағы бастан-аяқ өрілген Сыдық сұлтанның іс-әрекеті ортаазиялық түркі-мұсылман жұртына ортақ құндылық ретінде дәріптелу керек деген парасатты ой қозғады.
Сонымен бірге басқосуда ғалым-жазушы Тұрсын Жұртбай, Парламент Мәжілісінің депутаты Дархан Мыңбай, тілші-ғалым Шерубай Құрманбайұлы және т.б. зиялы азаматтар сөз алып, тарихи кітап туралы өз ой-пікірлерін айтты.