Кентау Назарбектің «Ұйықтап жатқан жүректі ән оятар» атты шығармашылық кеш

Кітапханада «Ұйықтап жатқан жүректі ән оятар» атты  әнші, композитор Кентау Назарбектің шығармашылығына арналған әдеби-сазды кеш болып өтті.

Президент Қасым-Жомарт Кемелұлы Тоқаев қазақтың бас ақыны Абай Құнанбайұлының 175 жылдық мерейтойын мемлекеттік деңгейде атап өту туралы Заңға қол қойған болатын.  Осыған орай аталмыш іс-шара 2020 жылы Абай Құнанбайұлының туғанына 175 жыл толуына орай ұйымдастырылып отыр.

Іс-шараның мақсаты – Ұлы Абайдың рухани және музыкалық мұраларын кеңінен насихаттау, жастар арасында музыкалық талғамды қалыптастыру және ұлттық музыкалық мәдениетті тәрбиелеу, композитор Кентау Назарбектің Абай туралы музыкалық туындыларын таныстыру болды.

Кентау Назарбек – композитор, қалалық және республикалық байқаулардың жүлдегері. Ол хакім Абай мен Шәкәрімнің дәстүрінде елдікті ұлықтап, ұлттың рухын көтеретін көптеген әндер жазды.  Композитор Ұлы Абайдың бірнеше өлеңдеріне ән шығарған.  Бұл шарада Абай туралы «Абайдың әні» және «Құнанбай» атты өлеңдері таныстырылды.