«Қазақ мемлекеттілігінің формуласы» атты монографиясының тұсаукесері

17 қарашада ҚР Ұлттық академиялық кітапханасында тарих ғылымдарының докторы, профессор Оразбаева Алтайы Иранбекқызының 2017 жылдың қазан айында Москваның «PRESS-BOOK.Ru» баспасында жарық көрген «Қазақ мемлекеттілігінің формуласы» атты монографиясының тұсаукесері болып өтті.

Монографияда қазақ мемлекеттілігі генезисі мен эволюциясының ілімдік-әдіснамалық мәселелеріне концептуалды талдау жасалған. Зерттеу фокусында – Қазақстан территориясындағы мемлекеттілік құрылыс архитектурасының бірегей конструктары мен әмбебап матрицасы.

Басылымда мемлекеттіліктің өзекті де кілтті онтологиялық ұғымдары: «территория», «әлеуметтік кеңістік», «соғыс», «билік», «символизм», «архетип» және т.б. категориялары негізінде, қазақ ұлттық мемлекеттігінің ішкі табиғаты мен саяси мәдениеттің қалыптасу себептеріне, оның геосаяси, саяси-құқықтық, әлеуметтік-мәдени аспектілеріне ғылыми зерттеу жүргізілген.

Қазақ мемлекеттілігі дәстүрлері мен формуласының танымы пәнаралық деңгейде ғылыми ізденістермен шұғылданушы жаңа форматты зерттеушілер мен әлеуметтік ілімнің түрлі салаларымен айналысатын мамандардың қызығушылығын тудыруы ықтимал.

Тұсаукесер рәсіміне жетекші ғалымдар, ғылыми қызметкерлер, сонымен қатар Астана қаласының жоғарғы оқу орындарының профессорлары мен оқытушылары, студенттер, бұқаралық ақпарат құралдарының өкілдері қатысты.