ШЕТЕЛДІК БАҚ ӨКІЛДЕРІ ҰЛТТЫҚ АКАДЕМИЯЛЫҚ КІТАПХАНАДА

Бүгін біздің кітапханамызға АҚШ, Италия, Ұлыбритания, Египет, Испания, Жапония, Бразилия, Оңтүстік Корея, Канада, Австралия, Индонезия, Франция, Австрия, ҚХР және Оңтүстік Африка елдерінен БАҚ өкілдері келді.

Шетелдік БАҚ өкілдері зиялы қауым өкілдеріне көкейлерінде жүрген сауалдарын қойып, жауап алды. Кездесу барысында дала өркениетінің құндылығы мен ерекшеліктері, көшпелі қоғам мен табиғаттың жарасымдылығы, рухани жаңғыру бағдарламасының жүзеге асуы, қазіргі қазақ әдебиетіндегі жаңашылдықтар, шет мемлекеттер арасындағы әдеби-мәдени байланыс дәрежелері және т.б. әңгімелер қозғалды. Сондай-ақ, қазақ елінің латын графикасына көшу мәселелеріне қатысты зиялы қауым өкілдерінің көзқарастарын да білуге тырысты.
Іс-шараға зиялы қауым өкілдерінен Тұрсын Жұртбай, Ғарифолла Есім, Болат Көмеков, Оңайгүл Тұржан жəне Маржан Ершу қатысты.
Әлемнің 15 елінен жиналған бар-жоғы 21 журналист Қазақстан мемлекетінен алған әсерлерін айтып тауыса алмады. Енді олар бір апта бойы Астана, Алматы, Шымкент және Түркістан қалаларына да мəдени нысандарды аралауға шығады.

Айта кетейік, олардың арасында әлемге әйгілі АҚШ-тың «Forbes» және «Фрилансер», Италияның ИА «INTERRIS», Испанияның «ElCultural» журналдарының, Оңтүстік Кореяның «JoongangIlbo» газетінің, Египет «Нил-Культура» және «OnTV» каналдарының және т.б. журналистері бар.