Ахмет Байтұрсынұлының 150 жылдық мерейтойына орай «Ұлттың ұлы ұстазы»атты кітап көрмесінің ашылуы және ғалымның өмірі мен шығармашылығына арналған жиын

11 ақпан күні сағат 12.00-де ҚР Мәдениет және спорт министрлігінің қолдауымен ҚР Ұлттық академиялық кітапханасы ағартушы-ғалым, қазақтың рухани көсемі атанған Алаш ардақтысы, Ұлт ұстазы Ахмет Байтұрсынұлының 150 жылдығына орай «Ұлттың ұлы ұстазы» атты кітап көрмесінің ашылуы және  ғалымның өмірі мен шығармашылығына арналған жиын өтті.
Іс-шараның мақсаты – Ахмет Байтұрсынұлының ғылыми және шығармашылық мұрасын зерттеу, насихаттау, жан-жақты таныту, рухани құндылықтарымен танысу, өскелең ұрпақтың рухани мәдениетін арттыру.
Зиялы қауым өкілдері қатысқан жиында Ұлт ұстазы Ахмет Байтұрсынұлының қазақ жазуының тарихы, қазақ тіл білімінің дамуына қосқан үлесі, ұрпақ тәрбиесіндегі маңызы және ұлттық идеологияны қалыптастырудағы рөлі жөніндегі мәселелері талқыланды.
Игілікті шараға түркітанушы ғалым, филология ғылымдарының докторы, профессор Шәкір Ибраев, Қазақстан Жазушылар одағы басқарма төрағасының орынбасары, профессор Бауыржан Жақып, ҚР Ұлттық академиялық кітапханасының басшысы, педагогика ғылымдарының докторы, профессор Үмітхан Мұңалбаева, филология ғылымдарының докторы, профессор Рақымжан Тұрысбек, алаштанушы, ғалым,  филология ғылымдарының кандидаты Қайрат Сақ, ақын, Қазақстанның еңбек сіңірген қайраткері, Қазақстан Жазушылар одағының Нұр-Сұлтан қалалық бөлімшесінің төрағасы Дәулеткерей Кәпұлы,  жазушы, Қазақстан Республикасының Еңбек сіңірген қайраткері Сәдібек Түгел, ақын, өнертанушы Серік Оспан және жазушы, «Құрмет» орденінің иегері Бақытжан Тобаяқов, ақын Маржан Ершу т.б. журналистер, оқырмандар мен кітапханашылар қатысты.
Ахмет Байтұрсынұлы - әдебиет зерттеуші ғалым, түркітанушы, публицист, педагог, аудармашы, қоғам қайраткері . Қазақ халқының  20  ғасырдың  басындағы  ұлт - азаттық  қозғалысы  жетекшілерінің бірі, мемлекет қайраткері, қазақ тіл білімі мен әдебиеттану ғылымдарының негізін салушы ғалым, ағартушы, Алаш-Орда өкіметінің мүшесі.