«БАЛАЛАР ӘДЕБИЕТІ – ҰЛТ БОЛАШАҒЫ» атты балаларға арналған кітап апталығының салтанатты ашылуы өтті

Қазақстан Республикасы Ұлттық академиялық кітапханасында «2021 жыл – Қазақстанда балалар мен жасөспірімдердің кітап оқуын қолдау жылы» аясында Қазақстан балалар жазушылары мен еліміздің зиялы қауым өкілдерінің қатысуымен «БАЛАЛАР ӘДЕБИЕТІ – ҰЛТ БОЛАШАҒЫ» атты балаларға арналған кітап апталығының салтанатты ашылуы өтті. 
 Кітап апталығында әр түрлі бағыттағы іс-шаралар жоспарланған. Салтанатты ашылу рәсімінен соң балалар ақын-жазушылары мен әдебиет зерттеушілері, жас оқырмандар және олардың ұстаздарының қатысуымен «Менің сүйікті кітабым» атты оқырмандар конференциясы өтті. Конференцияда  жас оқырмандар мен ақын-жазушылар ой бөлісіп, пікір алмасады. Жиынның мақсаты - балалар жазушыларын көпшілікке таныту, балаларды кітап оқуға ынталандыру, балалар әдебиетіне ден қоя отырып, қоғамды оқу үдерісіне ілестіру, балалардың оқу мәдениетін қалыптастыру, балалар әдебиетінің маңызы мен ерекшелігін айқындау. 
Одан соң, балалар жазушысы Жеңіс Қашқыновтың шығармашылығының таныстырылымы өтеді. Таныстырылымның жүргізушісі - ақын, Қазақстан Жазушылар одағының мүшесі Ербол Бейілхан, спикері – жеңістанушы, журналист Ернат Мелсұлы. 
Іс-шараға жазушы, ақын, сатирик Толымбек Әбдірайым, ақын, Қазақстан Жазушылар одағы Нұр-Сұлтан қалалық филиалының төрағасы Дәулеткерей Кәпұлы, педагогика ғылымдарының докторы, профессор, ҚР Ұлттық академиялық кітапханасының басшысы Үмітхан Дәуренбекқызы ақын, драматург, Қазақстан Жазушылар одағының мүшесі, Өскемен қалалық мәслихатының депутаты Әскерхан Ақтай, ақын, жазушы, Қазақстан Жазушылар одағының мүшесі Ұларбек Дәлей, балалар ақыны, Қазақстан Жазушылар одағының мүшесі Олжас Қасым және басқа да зиялы қауым өкілдері қатысты.