“Абай және рухани мұра” атты кітап-иллюстрациялық көрмесінің салтанатты ашылу рәсімі өтті.

30 қазанда ҚР Мәдениет және спорт министрлігінің қолдауымен ҚР Ұлттық академиялық кітапхананың ұйымдастыруымен ҚР Ұлттық музейінде Абай Құнанбайұлының 175 жылдығына арналған “Абай және рухани мұра” атты кітап-иллюстрациялық көрмесінің салтанатты ашылу рәсімі өтті. 
Көрменің ашылу салтанатына ҚР Ұлттық музейінің директоры, ҚР қоғам қайраткері, өнертану докторы Арыстанбек Мұхамадиұлы, ҚР Академиялық кітапханасының директоры, педагогика ғылымдарының докторы, профессор Мұңалбаева Үмітхан Дәуренбекқызы, Ақын, ҚР еңбек сіңірген қайраткері, Қазақстан Жазушылар одағы Нұр-Сұлтан қаласы филиалының директоры, Халықаралық «Алаш» әдеби сыйлығының лауреаты Дәулеткерей Кәпұлы, филология ғылымдарының докторы, профессор, Абайтанушы Шерубай Құрманбайұлы, жазушы-сатирик, халықаралық “Алаш” әдеби сыйлығының иегері Көпен Әмірбек қатысты.
Көрме негізгі 3 бөлімнен тұрады. 1-бөлім Абай Құнанбайұлының өмір жолына арналса, 2-бөлім шығармашылығын дәріптейді. Ал 3- бөлім «Абайтану» бөлімі. Сондай-ақ Абай атамыздың сүйіп оқыған кітаптары мен әр тілде басылып шыққан кітаптары  да орын алған.  Бұл көрмеге «Абай елі» кітап альбомы қойылып, ақынның туған жері Жидебай шатқалы инсталляция арқылы (қазіргі Шығыс Қазақстан облысының Абай ауданы) бейнеленді. Сондай-ақ, «Абай және Зере» бейнелері сахналанып, сол кездегі тұрмыс белгілері бар киіз үйдің едені, ақынның сүйіп ойнайтын тоғызқұмалақ ойыны көрермендер назарына ұсынылды. Абайдың 9 жасында жазылған «Кім?» атты сатиралық шығарма оқылды.